Dewa Sorekî ya qezaya Mazgêrdî ya Dêrsimî de Huseyîn Keskîn (52), cinîya ci Gunduze Keskîn û lajê ci Baran Keskîn 5 serrî verî berê dewe de xo rê xeyme akerde û dest pê heywankarîye kerd. Keyeyê Keskînî nika 150 mêşna û 70 bizan weye keno. La krîzê ekonomîkî ra zehmetîye anceno. Keyeyê Keskînî îfade kerd ke fîyatê her çîyî vera zêdîyeno coka ê hînî nêeşkenê heywananê xo weye bikerê.

Huseyîn Keskîn dîyar kerd ke 2 serrî yo vayan ra heywankarîye binê gefî de ya û vat: ''Yew pêleka simêrî bîya 250 lîra. Ma nêeşkenê bihêrînê. Xora ziwabîyayîşî ra erazîyê ma zî bibereket nîyê.  Her çi çar qat bîyo vay.  Ma hînî nêeşkenê heywanan weye bikerê.Qasê 250 pezê mi estê. Mesrafê derzîna înan zî esto. Derman zî bîyo vay. Ma senî xo bidevirnê? Eke wina dewam bikero ma do heywananê xo biroşê.''