Dewa Oyumcuya Corêne ya qezaya Mazgêrdî ya Dêrsimî de 20 pezkovîyî telef bibî. Cigêrayîşan ra dima eşkera bi ke pezkovîyî nêweşîya çorrî ra merdê. Herême do bigêrîya binê karantîna.  Muxtarê dewe Huseyîn Doganî da zanayene ke pezkovîyan nêweşîye meşnayan ta girewte.

Doganî îfade kerd ke goreyê cigêrayîşê înan Mazgêrd de têna 10 pezkovîyî mendî. Doganî vat: ''Herêma ma de heywanî nêmerdî. Ma nika vera qerqilîyenê, xozaya ma çin bîya. Verî tîya de 200 pezkovîyî estbî nika têna 10 pezkovîyê ma mendî. Pezkovîyî seba şarê nê erdî fîraz ê la eke kes paştî nêdo ez bi sereyê xo eşkena se bikera?'' 

Doganî ard ziwan ke şîwanê meşnayanê xo nêdestûr benê herêma pezkovîyan û vat: ''Veterînerî vanê pezkovîyan meşnayan ra nêweşîye girewta. Ma verî dekewtişê nê herêman qedexe kerdbi, gerreyê şîwanan kerd. La çîyêk nêvurîya.''

Doganî da zanayene ke seywanî ey rê gef wanenê û vat: ''Armancê ma pawitişê heywanan o. Ma herêma xo de seydîye nêwazenê. Pê kiştişê pezkovîyan spor beno? Wa na babete de selahîyetdarî zî wezîfeyanê xo bikerê.''