Krîzê ekonomokî tewr zaf zî maneyê kesanê ke heywankarîye û citkarîye kenê şikit. Dêrsim de şar seba ke tim zem beno û her çî bîyo vay, tengayî de yo.

Hemwelatîyan ra Mehmet Taçyildizo ke  heywankarîye keno vat: ''Mi tim no kar pê keyfî kerdêne la seba ke debir zaf bîyo vay ma nêeşkenê nê karî bikerê. Her çî zaf bîyo vay. Dewlete qet hetkarî nêdana. Verî keso ke yew vinceyê herra ci zî bibîyêne na herre ramitêne û pê îdareyê xo kerdêne la nika hinî bîyo ke şar nêeşkeno herra xo biramo. Rîyê krîzî ra mi hûmara heywananê xo kerde kême. Peynîro ke ma roşenê ci rê biney zem bîyo la debiro ke ma genê ci rê hîrlab-çarlab zem bîyo. Ma tim wisar bizyeyî şitî ra kerdêne û alef  dayêne ci la seba ke fîyatî vayê ma emser hema hay şit danê ci. Bi qala kilme heywankarîya ke ma pê keyfî kerdêne nika  ma rê bîya derd û kul.''

Askare Kiliça ke bi serran o heywankarîye kena aye zî rîyê vayîye ra lomeyê xo kerd. Kiliçe ard ziwan ke aye bi rotişê ron û turaqê îdareyê xo kerdêne la seba ke hinî nêeşkena heywanan weye bikero verî pes û dima ra zî diwarê xo roto û vat têna di mangayî destê  ci de mendî. Kiliçe vat: ''Timûtim her çîyî rê zem beno ez ganî senî heywanan weye bikerî. Bajaran de rewşe xirabêr a. Şar çopî ra nan arê dano. Hinî dewan de zî şar vêşano. Ez mecbur nê wird mangayanê xo zî roşena û şina cayê lajê xo yo ke teberê welatî de yo. Ez zana nê serran ra dima ez nêeşkena welatê xo ra dûrî de biciwîye la yewna çareyê mi çîn o.''