Dêrsimo ke bi têkoşînê xo yê vera gefan, seydwanîye û madenkarîye tim rojdem de yo, rindîya xo ra tawîz nêdano. Bi desan nebatanê endemîkan reyde lewanteyî zî Dêrsim de şîn benê.

Dewa Tekelî ya qezaya Çemişgezekî ya Dêrsimî cayanê rindan ê lewanteyan ra yew a.

Dewij Nadîr Hozatî verî se hezar bezreyê lewanteyan eştî erdî û vîst hezar kokê nê vilan ramitî. 2 serran dima zî Hozatî berhemê xo vistî destî. Hozat wazeno pê nê lewanteyan hem debara xo bikero hem zî dewijan zî teşwîqê ramitişê lewanteyan bikero.

Hozatî ard ziwan ke ey sey hobî dest pê ramitişê lewanteyan kerdo û vat: ''Şaristan û qezaya ma de no xîreto verên bi, no zaf muhîm o. Nika zî lewanteyî ber anê. Wexto ke ma tira rûn vet ma do zaf kêfweş bibê. Ma do embazanê xo yê dewijan tîya de bidê xebitnayene. Ciwanê bêkarî tîya de xebitîyenê. Kêm zî bibo no hetkarîya madîye dano ciwanan. Heyf ke welat de zîret ho qedîyeno. Hêvîya mi a ya ke dewijî zî dest pê ramitişê lewanteyan bikerê.''

Hozatî îfade kerd ke lewanteyî zaf bala fotografkêşan û merdimanê bînan ancenê û vat: ''Lewanteyî vilê zaf rind ê. Lewanteyî parfuman û warê kozmetîkî de şuxilîyenê.''

Melîha Kolana ke seba ramitişê lewanteyan bena hetkar, vat ke ganî cinîyî na babete de bêrê teşwîqkerdene. Kolane vat: ''Nê karî de keda cinîyan nêna werdene. Zor û zehmetîyê welatî werte de yê. Ez hêvîdar a ke êyê ke koçê şaristanan kerdo, abigêrê dewanê xo û lewanteyan biramê, heywanîye û zîretî bikerê.''