Dêrsimijan vera projeyê awbendî nêrazîbîyayîşê xo mojna

Dewa Segedîkî ya qezaya Xozatî ya Dêrsimî de îhaleyê awbendê Cevîzlîdere ame kerdene. Dewijan vera awbendî nêrazîbîyayîşê xo mojna û vat: ''Ma tîya de heywankarîye, hingedarîye, zîret kenê. Awbend do dewa ma birijno.''

Dewa Segedîkî ya qezaya Xozatî ya Dêrsimî de îhaleyê awbendê Cevîzlîdere ame kerdene. Çarçewa projeyî de dewe do bi temamî binê awe de bimana. Dewijan vera awbendî nêrazîbîyayîşê xo mojna. Dewe de 11 keyeyî, erazîyê zîretî estê û çimeyê debare yê dewijan heywankarîye, hingedarîye û zîret ê. Dewa Segedîkî de xeylêk cayê tarîxîyî estê ke nînan ra yew zî şapelê armenîyan o.

Dewije Gulbahare Kahraman ard ziwan ke înan binê pêro zehmetîyan û tedayan de zî dewa xo nêteriknaya û vat: ''Ma tîya de heywankarîye, hingedarîye, zîret kenê. Awbend do dewa ma birijno. Ma senî dewa xo biteriknê şorê ça?''

Dewij Yusuf Aslanî zî wina vat: ''Awbend qaşo dewa Cevîzlîdere de biameyêne kerdene la semedo ke a dewe raya xo dana AKPyî dewa ma bîya qurbane. No îhale bêusul o. Bi nê hawayî dewa ma ameye sergunkerdene.''

Dewij Teslîm Tunçî pare kerd ke proje xelet o û vat: ''Yew eleqeyê ma bi projeyî çin o. Çira dewa Cevîzlîdere de nêkenê tîya de kenê. Çewî şarî ra çîyêk pers nêkerdo, rizaya ma nêgirewta.''