Polîtîkayanê îqtîdarê AKP-MHPyî ra Tirkîya û Vakurê Kurdîstanî de her ke şino krîzo ekonomîk beno giranêr. Şarê Dêrsimî qala tesîranê krîzê ekonomîkî kerde.

Hunermenda kuçeyî Songule Yildirim îfade kerd ke semedo ke Dêrsim de berardiş çin o her çi zaf vay o. Songule vat: ''Na dinyaya bêedalete de se beno xizanan rê beno, zengînan rê çîyêk nêbeno.''

Hemwelatî Hasan Kahramanî ard ziwan ke ê têkoşînê debare kenê û vat: ''Rewşa nê welatî hînî hol nêbena. AKP şoro zî çîyêk nêvurîyeno çunke ganî sîstem bêro vurnayene.''

Ercan Karataşî da zanayene ke Dêrsim de îmkanê karî çin ê û vat: ''Ciwanê ma bêkar ê. Şarê Dêrsimî hînî hesabê sibayî keno. Heywankarîye, citkarîye, sanayî çin ê. Ciwanî serê sibayî ra heta şanî qewexaneyan de nişenê ro.''

Hemwelatîyê bi nameyê Barişî vat: ''Vaya her berhemî 1 lîra ra bîya 10 lîra. Tek çareserîye esta; ganî AKP pê weçînayîşî şoro.''