Platformê Demokrasî û Kede yê Dêrsimî vera talanê xoza 8ê teşrîna verêne de Meydanê Seyîd Rizayî de, bi şîarê 'Ma do ser bikewê, ma waranê cuye pawenê' do mîtîngêkî bikero.

Hemsereka HDPyî ya Dêrsimî Nazliye Çelîk Oz bale ante projeyanê madenan û awbendan ser û vat: ''Ma vera hişmendîya qirkerdişê xoza mîtîngê xo do bikerê. Ma seba ney zî Pulir, Mazgêrt û Qisle de xebatan kenê. Ma do Dêrsim de biqîrê vajê 'xozaya xo bipawê.' Ma pîya vera talanî vajê bes o. Wa şarê ma wayîrê Munzurê xo, Mercan û Pilemurîye vejîyê. Cayanê projeyan de gorê ma est ê. Seba ke gorê ma çin nêbê ma têkoşîn bikerê.''

Serekê EMEPî Ergîn Tekînî vist vîrî ke Xozat de çar mengî yo darî birîyenê û ruhsatê madenî dîyeno xeylêk şîrketan. Tekînî vat: ''Ê dekewenê Dêrsimî û xozaya ma qir kenê.  Ma mîtîngê xo de vera nê telanî tewirê xo bimojnê. Ma venga şarê xo, kesanê dmeokrat, azadîgîr û kedkaran danê ke wa paştî bidê mîtîngî.''

Hemserekê HDPyî qezaya Pêrî Orhan Çelebîyo ke herinda ci de qeyûm amebi tayînkerdene zî îfade kerd ke her cayê Kurdîstanî de xoza yena talankerdene û qirkerdene. Çelebîyî vat: '' Se ra nêmeyê xozaya ma warê madenî bîyo. No zî yeno manaya çinkerdişê cografyaya Dêrsimî. Tîya de cuya pêro gandaran binê tehluke de ya. Ma venga pêro şarê Dêrsimî, heskerdoxanê xoza û dostanê xo danê ke wa Meydanê Seyîd Rizayî de tewrê mîtîngî bibê.''