Xebata peyzajî ya Çimeyanê Munzurî texrîbatî bi zelalî eşkera kena. Dêrsimijan vera texrîbatî nêrazîbîyayîşê xo mojna û pare kerd ke ganî Çimeyê Munzurî sey merkezê bawerîya Raya Heqîye bimanê.
Qezaya Pilurî ya Dêrsimî de Çimeyanê Munzurî de 10ê tebaxa 2020î de rixmê nêrazîbîyayîşê şar û dezgehanê ekolojî xebata peyzajî dîyabî ddestpêkerdene. Dima ke dewa amebî akerdene îhaleyê peyzajî amebi betalkerdene.
Hemwelatîyî îfade kenê ke Çimeyê Munzurî merkezêkê bawerîye yê û ganî xozayîya ci nêra xeripnayene.
Feraye Mertogluyo ke reya verêne ameya Çimeyanê Munzurî vat: ''Nika ez nêwazena tîya war verda şora. Ganî tîya seba turîzmî nêameyêne akerdene. Tîya merkezê bawerîya elewîyan o. Binê nameyê turîzmî de bazarkerdişê nê çimeyan elewîyî şeqiznayî. Wa kes destê xo medo Çimeyanê Munzurî.''
Gulcîhane Şîmşek zî da zanayene ke Çimeyê Munzurî vurîyayê warê înşaatî û vat: ''Nê polîtîkayanê texrîbatî ra semed taybetmendîya Çimeyanê Munzurî destî ra şîya. Ganî nê çimeyî bêrê pawitene.''
Yasemîne Soylemez eşkera kerd ke a key bêra Çimeyanê Munzurî xo zaf hol hîs kena û vat: ''Ez zaf qehirîyena ke merkezanê bawerîye rê mudaxele yeno kerdene. Tîya pê xebata peyzajî ame vurnayene. Ganî merkezê bawerîye xozayî bibê. Ganî merdimî wayîrê nê cayan vejîyê.''
