Yeno waştene ke dewa Sutluce ya Dêrsimî de tesîsê çopan bêro viraştene. Dewijan vera projeyî nêrazîbîyayîşê xo mojna.

Muxtarê dewe Îmam Çelîkî pare kerd ke tesîs do xozaya dewe texrîb bikero û vat: ''Ma vera tesîsî nîyê la wa dewa ma de no tesîs nêvirazîyo. Xozaya ma texrîb mekerê. Eke şima nê daristanî çin bikerê no ma rê beno zulm.''

Hemwelatîyê bi nameyê Suleyman Ozmenî zî vat: ''Tîya de daristanê bi 200 hektaran esto û ê wazenê tede tesîs virazê. Na cografya de her kes xo rê vanê komunîst, sosyalîst ûsn. La vengê înan nêvejîyeno. Îlahîm gereka projeyê dewlete bibo? Semedo ke şaredarîye nê projeyî kena her kes bêveng o.''

Alî Arslanî ard ziwan ke êyê ke vanê 'soz selahîye û bire ê şarî yê' nika goş nêdanê şarî ser û vat: ''Tîya de 3 jîyargeyê ma estê. Eke şaredarîye nê tesîsî viraza 10 hezar -15 hezar daran do bibirna. Çimê înan de nê cayê jîyargeyê ma ne zî cayê daristanê ma estê. Ma nê tesîsî nêwazenê.''

Hidir Kuluyî vat: ''Eke no proje xozaya ma texrîb bikero ma nêeşkenê tîya de heywankarîye bikerê. Ma venga şaredarîye danê ke wa tesîs cayêkê bînî de bikerê.''

Huseyîn Arslanî vat: ''Tesîs do qasê 200 metre jîyargeyê ma ra nêzdî bibo. Wa bawerîya ma rê hûrmet bimojnê. Goreyê elewîtîye ganî rizaya ma bêra girewtene.''

Zulfîkar Guçluyî vat: ''No proje qirkerdişê xoza yo û yeno a mana ke ê do heqê ma yê cuye nêhesibnenê.''