Îdiro ke şaristananê tewr bereketînan ê Vakurê Kurdîstanî ra yew o, beno çol.

Kîmyager Yusuf Abayî derheqê babete de ANFyî rê qisey kerd. Abayî vist vîrî ke Îdir wayîrê cografyayêka zaf berze yo la rixmê ney zî bi lezî beno çol.

Abayî vat: ''Îdir mîyanê deştêke de yo ke dormeyê ci de koyê Elegez, Agirî, Zor û Arasî est ê. Na deşta ke bi Çemê Arasî yena awdayene, seba her tewirê zîretî munasîb a. Germinîya Îdirî 11-12 derece ya, seba ke tede mîkroîklîm est o erdê ci bereketîn o. La rixmê hende zengînîye zî Îdir ho beno çol. Qezaya Aralikî û binê Koyê Agirî nika ra sey çolî asenê. Nê warî waro diyîn ê erozyonanê tewr pîlan o. Reyna qezaya Tucluca, Girê Gokkuşagiyî, dewê Halfelî û Xoşxeber, warê Erhaciyî warê erozyonî yê.

Faktorê ke Îdir de benê sebebê çolbîyayîşî nê yê: asta cografîke ya herême, asta kêmîya varanî, heywankarîye, zîreto bêplan, ziwatîye, kanê xîz û kerrayan, awankerdişê şaristanan û kêmînayîşê daran û daristanan, projeyê HESî û awbendê Çemê Arasî. Seba ke verê çolbîyayîşê Îdir û qezayanê ci bêro girewtene, verê erozyonî bêro girewtene ganî cade gamî bêrê eştene.''