Goreyê xebera Rojnewsî dewleta tirke Dola Saxan û Şeşdaran a Zaxoyî de, binê çimdarîya hêzanê PDKyî de, dest pê birnayîşê daran kerd û hema zî naye rê dewam kena. Dewleta tirke Rojawan û Vakurê Kurdîstanî de zî bi heman hawayî xoza talan kena.

Goreyê bîlançoya Partîya Keskan a Kurdîstanî dewleta tirle 3 mîlyon darê Behdînanî bernayî.

Akademîsyenê Zanîngehê Silêmanî û pisporê xoza Dr. Mihemed Genawîyî derheqê babete de qisey kerd.

Dr. Mihemed Genawîyî vist vîrî ke rejîmê Saddam Huseyînî sey dewleta tirke xoza talan kerdêne û vat: ''Saddamî kanîyê awe ziwa kerdêne û dewî vêşnayêne. Dewleta tirke ewro heman çi kena û daranê ma birnena. Na polîtîkaya tehlukeyîne bi xirabî tesîrê Kurdîstanî kena. La na polîtîka siba do tesîrê Tirkîya zî bikera, çunke sîstemê xoza wina yo. Çîyo ke dewleta tirke kena, sûc o. Merdimê nê cayî sîstemêko xozayî awan kerdo. No sîstem berhemê bi hezaran serran o. La kultur, ziwan û tarîxê ci yenê çinkerdene.''

Genawîyî xoza her kesî eleqedar kena û ganî her kes vera çinkerdişê xoza bibo wayîrê tewirêkî. Genawîyî vat: ''Tirkîya sûcê vera xoza kena, ganî bêra cezakerdene. Ez venga hemwelatîyan, dezgehan, wezîrîyan, hukmatanê Başûr û Iraqî û komelê mîyanneteweyî dana ke wa seba pawitişê xoza têbigêrê.''