Her serre hûmara domanan ê karkeran zêdîyena. Amed de her kuçe û taxe de domanê karkerî estê. Nê domanî rastê zor, zehmetî û tedayan yenê.

Emîno (14) ke Sûr de maskeyan roşeno keno vano ke hertim zabitayî hêrişê ci kenê la o neçarîye ra xebitîyeno. Emîn vano: ''Ez hem xebitîyena hem zî şina dibistane. Sûr de polîsan dibistana mi vêşnaye. Rewşa ma ya ekonomîke hol nîya coka ez xebitîyena. Ez çi kar bivîna kena. Zabitayî tim peyê ma de yê. Tim yenê dezgehê mi qelibnenê û dest nanê hacetanê ma ser.''

Mihemed (16) û Berfîne zî way û bira yê û semtê Ofîsî de sîmîtan roşenê.

Mihemed vano: ''Îmkanê ma çin ê ke ma sey domananê bînan bibê. Keyeyê ma xizan o coka ez xebitîyena. Ez nêmroje ra dima şina dibistane. Ez wazena biba doktor. Eke ez biba doktor keyeyê ma xizanîye ra xelisîyena. No fikr keno ke ez zêdêr bixebita.'' 

Osmano (16) zî Berê Koyî de awe roşeno û wazeno bibo cerrah. Osman vano: ''Babîyê mi karî ra îxrac bi, dadîya mi zî nêxebitîyena. Ez hem xebitîyena hem zî şina mekteb. Ez wazena biba cerrah. Coka ganî ez zaf bixebita. Eke ma debarê xo nêkerê beno ke keye mi nêerşawo dibistane. No mi tersneno.''

Reyna semtê Ofîsî de 3 domanê kênayî Sonda (11), Zelale (7) û Sîneme (8) destmalan roşenê. Xeyalê înan zî têna no yo ke wa desfter û qelemî înan bibê û pereyê înan zêdêr bibo. Kênayî vanê: ''Embazê ma eşkenê şorê dibistane la ma nêeşkenê şorê.''