Ekolojîsta Swêdij a 16 serrîye seba Nobelî ameye pêşnîyazkerdene
Kêneka Swêdij a 16 serrîye Greta Thunberg a ke seba îklîman wendegehan de serkêşîya grevan kena, seba xelata Nobelî ya serra 2019'î ameye pêşnîyazkerdene.
Cugehpawitoxa 16 serrîye Greta Thunberge, hetê hîrê wekîlan ra seba xelata Nobelî ameye pêşnîyazkerdene.
Wekîlo Norwecij Freddy André Øvstegård o ke Greta Thunberge pêşnîyaz kerda, ajansê AFP’yî rê qisey kerd û vat, “Ma Greta Thunberge pêşnîyaz kerde, çunke eke tedbîr nêro girewtene germo global wexto ameyox de do bibo bingeyê şer, alozî û koçkerdişan. Greta Thunberge, têgêrayîşêkê girseyî û cimatî yo ke tede haştîye esta da destpêkerdene.
Kênaka Swêdije Greta Thunberge, bibî sembolê çalakîyanê vera germîya globale. Thunberge, bi taybetî no Îne, vengdayîş bi wendekaran kerdibi ke ‘grevo global’ bikerê. Na çarçewa de yeno pawitene ke bi desan welatan de ciwanî 15'ê Adare de dersan boykot bikerê.
Thunberge, rojnameyê Swêdî yê Aftonbladetî rê qisey kerd û seba namzedîya nobelî vat, “Bêguman seba mi rûmetêk o. Çîyêko zaf baş o ke ez seba xelata wîna girde yena pêşnîyazkerdene. No hem çîyêko weş o, tayê zî balkêş o.”
Goreyê Øvstegårde namzedîya Thunberge ameye qebûlkerdene. Xelata Haştîya nobelî ya 2019’î, 11’ê Teşrîna Verêne de do bêra eşkerakerdene.
