Dewa Oyumcaya Corêne ya qezaya Mazgêrdî ya Dêrsimî de xeylêk pezkovîyî merdbî. Badê cigêrayîşî eşkera bi ke sebebê mergê pezkovîyan çorr o.

Goreyê eşkerayîya Mudirîya Daristan û Zîretî ya Dêrsimî numuneyê pezkovîyan Laboratowarê Enstîtuya Cigêrayîş û Kontrolî yê Veterînerî yê Xarpêtî de ameyî cigêrayene. Numeneyî Yewîna Cuye Koyî ya ke pabesteya Enstîtuya Cigêrayîşî ya  Ankara de ameyî analîzkerdene û netîceya ci de 24ê sibate de nêweşîya çorrî sey pozîtîfî ameye tesbîtkerdene. Eşkerayîye de ame vatene ke seba ke nêweşîye vila mebo tedbîrî ameyî girewtene û herêmê ke pezkovîyî tede merdî do bigerîyê binê karantîna.

Hetê bînî ra dewa Çanakçiya Corêne ya qezaya Mazgêrdî ya Dêrsimî de menga çeleyî de 8 pezkovîyî merdbî. Numuneyê pezkovîyan Xarpêt de laboratuwar de ameybî cigêrayene. Cigêrayîş de eşkera bibi ke pezkovîyî rîyê bakterîya bi nameyê Sphingomonas Paucimobilisî ra merdî.