Fatma debara xo bi ramitişê sewzî kena

Fatma Çitîl nêzdîyê 40 serrî yo karê ramitişî reyde eleqedar bena û pê debarê xo kena. Fatma vat: "Karê ma qet nêqedîyeno û ma heta şanî xebitîyenê. La ez karê xo ra ci ra hes kena."

Fatma Çitîla 50 serre nêzdîyê 40 serrî yo bi karê ramitişî dir eleqedar bena. Fatma dorê baxçeyê xo kerdo sera, xeylêk tewirê sewze û fêkîyan ramitê. Fatma hem kêfweşîya karê xo, hem zî zehmetîyanê cuye ser o qal kerd. 

Fatma destpêkê qiseykerdişê xo de vat ke aye verî Bazarê Taxa Jiyanî de xebitîyaya û vat: "Ez demêk derg bazarê taxa jîyanî de xebitîyaya. Uca de zî berardişê mi xeylêk ameyêne rotene û ecibnayêne. La dima ke kênaya mi de nêweşîya şekirî vejîyaye ez mecbûr menda ke nê karî ra vejîya. Bi no hawa mi zî dewe de karê xo dewam kerd. Tîya hem karê pesdewarî, hem zî karê ramitişî. Xora xeylê kesê dewe nê çîyan dir eleqedar benê. Ez serê sibayî 5î de wirzena. Ez destpêk de heywanan wey kena û dima ra derbasê baxçeyê xo bena. Karê ma qet nêqedîyeno. Heta şanî ma xebitîyenê."

Fatma bale ante serê zehmetîya karî ser û vat: "Helbet karê baxçeyî çiqas weş bo zî zehmetîyê ci zî estê. Ez semedê her şitilêke kedêke dana. Wexto ke şitilan ramnenê, naylon erzenê ser. Semedê ke ma şitilanê xo hawayê serdî ra bipawê, yan zî toz û varanî ra bipawê, naylon kenê. Eke ma naylon nêkerê ser, hawayê ser de wişk bibê. Sewbîna şitilan de xeylêk vaşê xerîbî benê zergûn. Semedê nê zî lazim o ke ma her wext aşêfe bikerê. Emsar semedê varanê tayî ra bereketê zîyanê ma zî kêm bi. Nika erdê ma ziwa bîyê. Coka ma mecbûr manenê ke roje 2-3 rey baxçeyê xo awe bidê. Nimûne; mi vizêr şan de baxçe awe da, no serê sibayî zî awe da la nika sey mi awe nêdayo aseno. Verê ma mabêne di rojan de awe dayîne. Sewbîna ganî awa zêde zî nêra dayene. Eke awa zêde bêro dayene zî pêro xirab benê, yan zî awa kêm bêro dayene pêro wişk benê. Yanî karê baxçeyî de pêmayîşê ewnîyayîşî esto."

Fatma tewr peyîn vat, hîna zaf cinîyî karê baxçeyî reyde eleqedar benê û vat sebebê nê zî nêzdîbîyayîşê cinîyan ê bi xoza yo. Fatma, wina qiseykerdişê xo qedîna: "Êdî semerê herre kê bîyo. Gerek tim pak bibê û toz nêkewo ser. Kedêka zaf pîl semedê nê lazim a. Keda tewr pîl destê cinîyan ra derbaz bena. Pêro dewijî karê ramitişî kenê. Cinî tewr zêde xo nêzdîyê nê karî kenê. Ez karê xo ra hes kena. Nêeşkena betal vindera. Xêrcê nînan di mangayê mi estê. Ez karê pesdewarî zî kena. Bi no hewl dana ke debara xo bi hawayêke bi ca bîyara."