'Ganî domanî bi kulturê kurdî bêrê weyekerdene'

Hemserekê MED-DERî Mehmet Esenî da zanayene ke polîtîkayê dewlete yê vera ziwan û kulturê kurdan tarîxî ra heta ewro dewam kenê û keyeyan ra waşt ke domananê xo bi kulturê kurdewarî weye bikerê.

Rêxistina Perwerdeyî, Zanistî û Kulturî yê Neteweyanê Yewbîyayeyan (UNESCO) seba ke bale bianca ziwananê ke binê rewşêka bitehluke de yê ser 21ê Sibate sey Roja Ziwanê Dayîke ya Mîyanneteweyîye îlan kerde. Na roje sey roja serrgêra kiştişê wendekaranê zanîngehî yê Bagladeşî zî yena yadkerdene ke seba rêkoşînê ziwanê xo hetê polîsan ra ameyî qetilkerdene. Tirkîya de zî komelê kurdî rayberîya na roje kenê û her serre bi çalakîyan na roje fîrazkerkene.

Kurdîstan de û Tirkîya de teda, astengî, qedexeyê vera ziwanê kurdkî û înkarê kurdan dewam kenê. Rîxmê nînan zî ziwanhesî, mamsotayî, şagîrtî, nuştoxî, ziwannasî û komelê kurdî wayîrê ziwanê xo vejîyenê û seba ke ziwanê kurdkî biba wayîrê statuyê fermîyî têkoşîn kenê.

Hemserekê MED-DERî Mehmet Esenî çarçewa  Roja Ziwanê Dayîke ya Mîyanneteweyîye ya 21ê Sibate de polîtîkayanê vera ziwanî ser o qisey kerd.

 Esenî vat: ''Dima ke Komara Tirkîya ameye awankerdene dewleta tirke pisporî erşawitî Kurdîstan. Nê pisporan cigêrayîş kerd ke kurdî senî asîmîle bibê. Pisporan raporanê xo de da zanayene ke kurdî se ra se bi kurdkî kultur û hunerê xo kenê û boya tirkî tira qet nêna. Dewlete naye seba xo sey tehluke dî û polîtîkayê asîmîlasyonî amade kerdî. Dima dewlete dest pê polîtîkayanê xo yê asîmîlasyonî kerd û hema zî nê polîtîkayî dewam kenê.

Dewlete sena menfaatê xo tay çîyî kerdî sey kanala televîzyonî û dersanê kurdkî. Labelê wexto ke kurdî seba ziwanê xo xîret kenê ke çîyêk bikerê dewlete cade verê kurdan gêna, hêrişê kurdan kena. Gereka kurdî nê polîtîkayan û hêrişê dewlete bivînê. Ganî her çi ra verî ma xo nas bikerê. Ma wayîrê ziwan û kulturê bi hezaran serran ê. Ganî ma abigêrê tarîxê xo û ma hêlêk xurt hêlêk qels nêbê; ma tim hîsger bibê.

Kulturê kurdî çi yo? Muzîkê kurdkî, sînemaya kurdî, kitabê kurdkî, kincê kurdî, kayê kurdî, werdiş û şimitişê kurdî yo. Wexto ke domanêk bi nînan pîl bibo eslê xo xo vîrî ra nêkeno. Ziwanê kurdkî têna bi kurs û musnayîşî nêbeno, ganî teqez bibo ziwanê perwerdeyî. Eke kurdî seba ziwanê xo israr nêkerê û tewirêkê xurtî seba perwerdeyê bi kurdkî nêmojnê beno ke ziwanê kurdkî vîn nêbo la do qels bibo. Her ke şino ziwanê kurdkî qels beno.''