Komeleya 'Berî Her Tiştî Zarok' (Verî Domanî) çarçewa peymananê domanan de seba averberdişê domanan xebatan kena. Komele serra 2017î de Amed de ronîyaye.

Sereka Komeleya 'Berî Her Tiştî Zarok' Cevahîre Sadak Duzgun derheqê xebat û projeyanê komele de qisey kerd. Duzgune ard ziwan ke ê armanc kenê ke hetê mental, huner, kultur û ziwanî ra domanan aver berê.

Duzgune vat: ''2016 de wexto ke qeyûm Şaredarîya Amedî rê ame tayînkerdene her hetî ra komel teng bi. Semedo ke ziwanê ma bîyêne vînî ma qerqilîyayêne. Komeleya ma seba pawitişê ziwan û kulturî xebatan kena. Domanê kurdî ziwanê xo ra dûrî manenê. Seke lîteraturê zanistî eşkera keno ziwan averşîyayîşê kesayetê domanan û prosesê pîlbîyayîşî de organêko dîyar o. ''

Duzgune bale ante xebetanê komele ser û vat: ''Ma bi hawayêkê bingeyî babetanê kultur, huner, heqanê domana, ekolojî, têdûştî, zanist, teknolojî, ziwan û sporî ser o vindenê. Prosesê janî de xebatê ma vindertî ka ma do newe ra dest pêbikerê. Xebatê ma yê onlineyî serkewte bibî.  Ma warê onlineyî de kargehê nuştişî kerdî û nê nuştişê domanan kerdî fîlmê kartonî. Bi rayîrê Ma Muzîkî ma pê muzîkî dest pê perwerdeyê ziwanî kerd. Dinya, Kurdîstan û Tirkîya ra xeylêk domanî tewrê nê perwerdeyî bîyî.''

Duzgune da zanayene ke înan seba cinîyan kargehî zî akerdî û vat: ''Verî dadîyî ameyêne verê berî de pabeyê domananê xo vindertêne. Ma seba înan kargehî akerdî. Kargehan de ma pîya hacetanê kayî, vevekan virazenê. Hacetê kayan ê plastîjî û seksîstî zerar danê mezgê domanan. Ma waşt verê ney bigêrê. Hacetê ma yê kayan kurdewarî yê. Nika kargehê ma de 62 cinîyî estê. Cinîyî bi hawayêkê kolektîfî xebitîyenê.''