Azadî e.Vî ra Mehmet Demîrî derheqê babeta teslîmkerdişê aktîvîstê kurdî Mehmet Çakasî de qisey kerd û bira ke Mehkemeya Qanûnê Bingeyî ya Almanya vera îşkence dabî vist vîrî. Demîrî vat ke ganî Çakas nêro teslîmkerdene.
Aktîvîsto kurd Mehmet Çakaso ke Zîndanê Uelzenî yê Almanya de tepişîyeno beno ke bêro tebersînorkerdene û teslîmê Tirkîya bêro kerdene.
Azadî e.V ra Mehmet Demîrî ra Mehmet Demîrî derheqê babete de ajansê ma rê qisey kerd.
Demîrî da zanayene ke derheqê dewaya Çakasî de roja pancşemeyî Hamburg de bi beşdarîya keyeyî, avûkatan û sîyasetmedaran kombîyayîşêk ameyo kerdene û vat: ‘’Balkêş o ke keye û avûkatan rê ameyo vatene ke dosyaya îltîcakerdişî ya Çakasî Îtalya de ameya qedilnayene la ma eşnawit ke dosya hema zî akerde ya. Nê wextî de ke PKKyî bira feshkerdişî girewta Bundeskriminalamt (Dayîreyê Krîmînalî yê Federalî yê Almanya) eşkerayîyêke daye ke ê nêeşkenê bira feshkerdişî raşta raşte biercnê û ganî bipawê. Ma eşkenê vajê ke werte de kayêko gemarin est o.
Demîrî ard ziwan ke seba Çakasî xeylê çalakîyî yenê kerdene û vat: ‘’Selahîyetê bire destê Wezîrîya Karanê Zereyî de yo. Mehkeme, dozgerî, avûkatî ûsn pêro pabesteyê ney ê. Goreyê avûkatê Çakasî wina pawîyeno ke Mehkemeya Qanûnê Bingeyîyî cewabê muracatî bidê. Ma do heta ke Mehkemeya Qanûnê Bingeyîyî bira xo bida çalakîyan rê dewam bikerê.’’
Demîrî pare kerd ke dewaya Çakasî do seba aktîvîstanê kurdan ê bînan zî biba nimûne. Demîrî da zanayene ke Çakasî rê cezaya zîndanî ya 2 serran û 10 mengan dîyabî û ganî o 4ê teşrîna verêne de vera bidîyêne. Demîrî vat: ‘’La nişka ra bira teslîmkerdişê Tirkîya kewte rojdem. Merdimê ke dewayê înan edlî yê yenê teslîmkerdene. La Çakasî seba îltîca muracat kerdibi û dosyaya ci sîyasî ya. Eke ma verê teslîmkerdişê Çakasî nêgêrê nimûneyê winayênî do bizêdîyê.
2010 de ciwanêko dêrsimij zî hetê Almanya ra teslîmê Tirkîya amebi kerdene. Ma o çax zî muracat kerdibi ke eke ciwan bêro teslîmkerdene do îşkence û kerdişanê xiraban bivîno. Wina zî bîyo. Avûkatan na rewşe tesbît kerde û Mehkemeya Qanûnê Bingeyî ya Karlsruhî birêke girewte û vat ke ‘Eke îşkence û kerdişanê xiraban bivînê merdimî do nêrê teslîmkerdene.’
Xora Tirkîya de aktîvîstê kurdî îşkence û kerdişanê xiraban vînenê. Almanya bi xo venga hemwelatîyanê xo dana ke nêşorê Tirkîya. Wextanê verênan de na bira Mehkemeya Qanûnê Bingeyî ya Almanya hetê Mehkemeya Heqanê Merdiman a Ewropa ra zaf reyî ameye caardene û mîsalê ney ameyî dîyene. Ma no zî pêşkêş kerd. Ma pabeyê ci yê ke meqamê Almanya bira tebersînorkerdişî nêgêrê.’’
