Komeleya Kultur, Hetkarî, Averberdiş û Komelî (KAYY-DER)  û Platformê Komeleyanê Gêxî, Depe, Azarpêr, Xorxol û Çêrme pê eşkerayîyêka hemparî vera projeyê madenî yê Gelîya Pêrî nêrazîbîyayîşê xo mojna.

Eşkerayîye de ame vatene ke Bingol Metal Madencilik A.Ş. wazeno dewa Eskîkavakî ya Gêxî de bigêro maden la dewa ra dima proje ame betalkerdene. La şîrkete narey zî raporê ÇEDî amade kerd û warê xebate kerd hîra.

Goreyê eşkerayîye şîrkete amadekarîye kena ke dewanê Îlbey, Eskîkavak, Cevîzlî û Aysakliyî de bigêro çimeyê sim, çînko û madeyê guleyî.

Eşkerayîye de nê çîyî ameyî vatene: ''Warê projeyî de berhemê ekolojîk û tarîxîyî estê, tewirê endemîkî estê. Eke proje bêro kerdene sîstemo ekolojîk do texrîb bibo. Projeyî reyde warê heywanê pezkovî, heş û vaşakî zî do texrîb bibo ke neslê nê heywanan hê qedîyenê û hingedarîya Çewlîgî ya ke dinya de namdar a, do zerar bivîna. Na herême zaf fîraz a û nêbo ke qurbanê rant û menfaatanê tay kesan biba. Ma venga pêro delegeyanê xo danê ke 25ê hezîrane de tewrê kombîyayîşê ma bê û seba vergirewtişê nê projeyî vengê xo berz bikerê.''