Herêma qezaya Xozatî ya Dêrsimî de 9ê gulane û 20ê gulane de leşkeranê tirkan wextê operasyonê leşkerî de daristanî da adirî ver.

Îdarekarê Komeleya Xoza ya Munzurî Ozkan Arslan û aktîvîstê xoza Haydar Çetînkayayî vera  şewatê daristanan nêrazîbîyayîşê xo mojna.

Ozkan Arslanî vist vîrî ke 90a n ra nata daristanê Dêrsimî bi hawayêkê sîstematîkî yenê vêşnayene. Arslanî vat: ''Dewij û roniştoxê Dêrsimî raşt kenê ke daristanî yenê vêşnayene la Walîtîya Dêrsimî û Mudirîya Daristanan a Dêrsimî ney qebul nêkenê. Naye ra pey zî qetî nê daristanî do bêrê vêşnayene. Dewlete bi xo nê şewatan vejena. Seba ke şewatî bêrê hewnakerdene ganî rayaumûmîye bêra awankerdene. Dewlete key rojawanê Tirkîya de şewat vejîyo mudaxele kena la Dêrsim de mudaxele nêkena. No tewirêko polîtîk o. Ma venga pêro şarê xo danê ke wa vera hêrişanê xoza têkoşîn bikerê û hîsger bibê.''

Aktîvîstê xoza Haydar Çetînkayayî zî vat: ''Sebebê ci çi beno wa bibo ganî şewatê daristanan bêro hewnakerdene. Ge ge şewatî bi hewteyan û mengan dewam kenê. Senî ke rojawanê Tirkîya de seba hewnekerdişê daristanan seferberîye yena kerdene ganî seba herêma ma zî heman çi bêro kerdene.''