Germîya globale û ziwatîye bîye sebeb ke awa Gola Wanî kêm biba. Xeylêk gol, çem, awbend û çimeyê hewzaya Gola Wanî ziwa bîyî. Semedê rewşa xirabe ra sere de flamîngoyî xeylêk gandarî neçare mendî ke cayanê xo yê cuye bivurnê.

Hewzaya Gola Wanî her serre bi hezaran flamîngoyan rê û xeylêk tewiranê milçîkan rê meymandarîye kerdêne. Ziwatîya waranê awe yê Çelebîbagi û Golagziyî yê qezaya Erdîşî, Nîvgirava qezaya Adilcewazî, xeylêk golanê dewanê Akçira, Gola Xwê ya Sarayî û Gola Akgolî ya Qelqelî warê cuye yê gandaran rê tesîrêka xirabî kena.

Hetê bînî ra ziwatîya hewza bena sebeb ke oksîjen zî bikêmîyo.

Serekê Komeleya Pawitişê Berheman ê Tarîxîyan û Xozaya Wanî (Van Çev-Der) Alî Kalçikî derheqê mesele de ANFyî rê qisey kerd. 

Kalçikî ard ziwan ke na rewşe netîceya germîya globale ya û eke germîya globale vejîya serê 1.5 derece dinya do felaketî reyde têrî bimana. 

Kalçikî vat: ''Herêma Zîlan verî qetî ziwa nêbibi. Sebebê nê felaketî germîya globale û polîtîkayê şaredarîyan ê. Semedo ke şaredarîye qeraxê Gola Wanî de rayîrî viraştî vaşê golî yanî çimeyê oksîjenî ziwa bîyî. Eke kerdişê winasênî dewam bikerê felaketê pîlêrî do biqewimîyê.''

Hemwelatîye Adilcewazî Ayhan Mînazî îfade kerd ke awa Gola Wanî zaf apey şîya, gola bi hezaran serran ziwa bîya û vat: ''Gola dewa ma her serre bi hezaran milçîk û gandaran rê meymandarîye kerdêne. Gola bi hezaran serran emser ziwa bîye. Eke wina dewam bikero hem dewa ma hem zî dewê bînî do bêawe bimanê.''