Şarê armenîyan 1915 de raştê qirkerdişêkê pîlî ame. Merkezê Erdîşî û dewanê ci de bi hezaran armenîyî ameyî qirkerdene. Heta 1917î Erdîş û xeylêk şaristanî binê kontrolê hêzanê rûsan de mendî. Dima ke rûsî şîyî trajedî û qirkerdişan zî dest pêkerd.

Dewanê Gelîya Zîlane yê qezaya Erdîşî yê Wanî de kurdî û armenîyî bi aramî pîya ciwîyayêne. La 1917 de dewê armenîyan ê Gelîya Zîlane hetê hukmatê tirkî ra ameyî talankerdene, dest nîya mal û mulkanê armenîyan ser û armenîyî ameyî qetilkerdene. Qala trajedîyanê armenîyan hema zî herême de yena vatene.

Nê trajedîyan ra yew zî trajedîya way û birayêkê armenî ya. Wexto ke dewa Marcasî û dewanê bînan de armenîyî ameyêne qetilkerdene way û birayê 11 û 12 serrî seba ke nêkewê destê leşkeranê hukmatê tirkî xo dewa Încesuyî de çirrî ra erzenê war û peynîya emrê xo anê. Şarê herême coka nameyê çirrî keno 'Ducan.'

Rixmo ke nê serebûtî 105 serrî xo pey de verdayî hema zî qala ci herême de yena kerdene.

Şaîr Ozgur Ceyhano ke dewa Încesuyî ra yo, ard ziwan ke serebûtê winasênî o çax her herême de qewimîyayê û ganî her kes nê dejanê ke o çax ameybî antene ra dersan bigêro.