Seke pêro dinya Vakurê Kurdîstanî de zî tehlukeyê zuwatîye beno pîlêr. Sere de Dîcle, Firat, Murad, Gola Wanî awa çimeyanê Kurdîstanî kêmîyena.

Derheqê babete de Hemvervatoxê Platformê Pawitişê Hewselî Vahap Işikliyî ANFyî rê qisey kerd.

Vahap Işikliyî îfade kerd ke modernîteya kapîtalîste bena sebebê zuwatî û krîzanê îklîmî û vat: ''Çimeyê xoza îsraf benê, daristanî yenê çinkerdene, awbendî zî awe kêmînenê. Eşkera yo ke sebebo verên ê zuwabîyayîşî awbendî yê. Zuwabîyayîş netîceya heskerdişê selahîyetdaran ê seba HES û awbendan a. Seba ke polîtîkayê şaşî yenê kerdene û xoza yena talankerdene zuwatîye qewimîyena. Pê polîtîkayanê ekolojîkan ganî verê zuwatîye bêro girewtene. Eke na mesele nêra çareserkerdene tehlukeyê pîlî do xo ramojnê.''

Vahap Işikliyî bale ante tesîrê prosesî yê vera dengeyanê ekolojîkan û gandaran ser û vat: ''Zuwatîye do biba sebebê nêweşîyan zî. Seba ke ekosîstem vurîyeno organîzmayî zî koç kenê. Cara çimeyê awe hê qedîyenê. Eke wina dewam bikero vîrusê neweyî do vejîyê werte. Eke awe çinba oakî zî nêbena, mergî zî zêdîyenê.''