Serekê Pêroyî yê Tarim-Orman Senî Ahmet Keleşî polîtîkaya zîretî ya hukmatî rexne kerde û derheqê zehmetîyanê karkerîya serrewextî de ANFyî rê qisey kerd.

Keleşî îfade kerd ke karkerê zîretî bi taybetî prosesê janî de mîyanê şert û mercanê giranan de xebitîyenî. Keleşî hêrişê nîjadperestî yê vera karkeranê kurdan vist vîrî û ard ziwan ke sebebê nê hêrişan polîtîkaya cîyakere ya îqtîdarî ya.

Keleşî vat: ''Meseleyê karkeranê serrewextî birînê komelî yê.  Nê karkerdî wareyê xo ra vejîyenê şinê cayanê bînan û rastê xeylêk zehmetîyan yenê. Zafê înan xeyman de manenê ke tede ceyran û awe çin a. Seba çareserîya meseleyan ganî odayê muhendisan, sendîkayî, dezgehî pîya bixebitê, citkaran reyde qisey bikerê û meseleyan tesbît bikerê.''

Keleşî derheqê hêrişanê vera karkeran ê kurdan de wina vat: ''Karkerê kurdî sey 'terorîst' dîyenê. Îmkanê înan çin ê ke xo îfade bikerê. Konseptê şerî nêverdano ke nê merdimî erdê xo de bixebitê. Sebebê nê hêrişan polîtîkaya cîyakere ya îqtîdarî ya.''