Komîteya Ekolîjî ya KCKyî derheqê qirkerdişê vera Baxçeyanê Hewselî  eşkerayîye daye û veng da ke wa her kes wayîrê xoza vejîyo.

Eşkerayîye de nê ameyî parekerdene:

“Îtîfaqo faşîst ê AKP-MHPyî yê rejîmê tirkî yê faşîstî sîyasetê xo yê îmha û înkarî sey şerê qirkedişî rayra beno. Pê nê hêrişan têna hêrişê estbîyayîşê kurdan nêkenê, kenê ke bi nameyê kurdan çîyêk nêmano. Wazenê xoza û kulturê kurdan zî çîn bikerê. Îtîfaqo faşîst Kurdîstan de şerêkê topyekunî rayra beno. Pê heme hêzanê xo her hetî ra hêrişê kurdan keno. Îqtîdarî ra heta muxalefetî her kes anto warê şerî. Heme dezgehê dewlete gorayê şerî ameyî serûberkerdene. Şerê qirkerdişî yo ke bi tecrîdê Îmraliyî ame destpêkerdene game bi game her hetê warê komelî ra vila beno. Ne huqûqê mîyannetweyîyî nas kenê ne zî huqûqê xo anê ca. Coğrafyaya Kurdîstanî de çekanê kîmyewîyan şuxulnenê. Vera Rojawanî hêriş kenê. Awa şarê kurdî sey leteyêkê şerî şuxulnenî. Kenê ke şarê Rojawanî pê janan û vêşanîye çîn bikerê. Coka her roje merkezanê weşîye, mekteb û warê cuye û warê berardişanê cuyekîyan bombarduman kenê.

Vera Başûrê Kurdîstanî hêrişê îşxalî yenê kerdene. Herêmanê Pawitişî yê Medya de şerê qirkedişî yeno rayraberdene.  Seba ke xo dima rêç meverdê meyîtanê leşkeranê xo zî vêşnenî. Pê çekanê kîmyewîyan kenê ke herra kurdan de wa qet ganîyêk memano. Botan, Bexdinan, Besta û Munzur de daran birnenê û daristanan talan kenê. Pê santralanê enerjî yê tîje kenê ke heme herêmanê Kurdîstanî îşxal bikerê. Verî seba ke gerîlayê azadîye yê Kurdîstanî rehat têmegêrê waranê gerîlayan de awbendî ameyênî înşakerdene. İnkey bi eynî sebebî Kurdîstan de  Semsûr, Êlih, Çewlîg, Amed, Xarpêt, Erzîngan, Meletî, Mêrdîn, Mûş, Riha, Şirnex û Wan de nizdê 19 mîlyon metre kare erazîye açarîyena yegayanê GESî. Rektorê Unîversîteya Dicle zî erazîya unîversîte ra 3.4 hektar îmarî rê akerdo ke Baxçeyanê Hewselî ke hetê UNESCOyî ra sey Mîrasê Kulturî yê Dinya yenê naskerdene çîn bikero.

Ganî ma wayîrê xozaya xo vejîyê û destur medê ke Dola  Dîcle bêro betonkerdene. Baxçeyê Hewselî  bi serran o semedê şarê Amedî sey dola beraketî yê û ganî wina dewam bikero. Heta ke Baxçeyê Hewselî nêrê pawitene çew nêeşkeno vera şerî vejîyo.  Heta ke çew vera şerî zî mevejîyo, ekolojîyo ke xeripîyayo nêeşkeno newe ra bêro înşakerdene. Nê semedî ra ma veng  danê heme kesanê ke vera şerî vejîyenê, têgêrayîşanê dorme û ekolîjî ke wa pê têkoşînê yewîbîyayeyî yê şaran vera talan û qirkerdişê xoza vajê bes o. Ganî ma desturê GES û rijnayîşê û çînkerdişê mîrasê ma yê tarîxkîyî medê.”