Serekê Tarim Orkam-Senî Ahmet Keleşî derheqê koçberîya dewan ra ver bi şaristanan û kêmîyayîşê berardişî de ANFyî rê qisey kerd.

Keleşî ard ziwan ke koçkerdişê berardoxan netîceya sîstemê neolîberal, sermayedaran ê hukmatî ya û vat: ''10 serranê peyênan de 13.2 mîlyon hektar erdê zîretî nêşuxilîya. 4,5 mîlyon citkaran ra têna 500 hezar citkarî eşkenê deynê xo bidê. Hukmat her cayî keno betonarme û polîtîkaya îthalatî ya sermayedaran ser o vindeno. Netîceya nînan de zî dewan ra ver bi şaristanan koçî qewimîyenê.Tirkîya bi mîlyonan teberî ra berheman gêna la erdê xo nêçînena. Ma do netîceyanê nînan zî bivînê.''

Keleşî ard ziwan ke netîceya polîtîkayanê sermayedaran ê dewleta netewe de şar feqîr bîyo û sermaye zî zêdêr qezenç kerdo. Keleşî vat: ''Ewro bingeyê ney de polîtîkayê neolîberalî, neteweperwerî û bawerî est ê. Şar sermaye keno zengîn. Sermaye zî yeno manaya dewleta netewe.

Ma do sey Tarim Orkam-Senî komxebatêke bikerê û çareserîye ser o nîqaşan bikerê. Ganî komelî abigêro berardişê xo yê tradîsyonelî ser. Dewan ra cîyabîyayîş yeno manaya cuye ra cîyabîyayîş. Tirkîya ha kewena prosesê weçînayîşî. Ma venga pêro partîyan, kurdanê ke dîyayê koçkerdene û karkeranê serrwextî danê ke wa tewrê komxebata ma bibê. Tek rayîrê çareserîye herre rê hûrmetkerdiş o. Herre rê hûrmet cuye rê hûrmet o.''