Erdlerzê 2011î û rejîmê qeyûmî ra dima Wan de hînî keyeyê verên û tarîxîyî êdî êdî çin benê.

Nê keyeyê ke kerpîç û sîmerî ra virazîyayî, hamnanan wenik û zimistanan germ ê. Keyeyê verênî yê Wanî binê nameyê vurîyayîşê şaristanî û îşxalkerîya 'viraze-biroşe' de çin benê.

Serekê Odaya Muhendisanê Înşaatî ya Wanî Mîhaîl Atîkî derheqê mesele de ANFyî rê qisey kerd. 

Atîkî vat: ''Destpêkê 1900an de Wan de yew mîmarîya taybete estbî. Banî seba ke vera erdlerzî zixm bo sey di qatin virazîyabî. Ma girîngîya nê fikrî nê keyeyanê verênan de vînenê.''

Atîkî da zanayene ke nê keyeyê verênî yenê rijnayene û herinda înan de keyeyê bikar la bitehlukeyî virazîyenê. Atîkî vat: ''Herêmê nê keyeyan pêşkêşê awanîye bîyî û vurîyayî merkezê rantî. Xeylêk herêman de bêcigêrayîşan banê zaf qatinî ronîyenê. Erdlerzî ra dima Wan de banê zaf qatinî, keyeyê qeçaxî zêdîyayî. Nê keyeyê verênî nika hê çin benê. Verî nê keyeyan ra beno ke hezar hebî estbî la nika têna di hebî mendî.''