Kurdîstan de rindîya her serrwextî cîya ya. Bi taybetî Çewlîg pê rindîya xozaya xo merdiman mest keno. Dewa Rizî ya qezaya Dara Hênî ya Çewlîgî de merdimî pê hingdarî debara xo kenê, dewe pê hingemînê xo namdar a. 

 Dewije Zahîde Aydemîr zî debara xo hem bi ramitişî û hem zî bi hingdarî kena. Keyeyê ci nêzdîyê 70 serrî yo nê karî keno û sey mîrasî neqlê neslê neweyî keno. Nika zî Zahîde nê karî kena. Zahîde derheqê karê xo yê hingdarîye de Jinnewsî rê qisey kerd.

 Zahîde ard ziwan ke hingdarî sey karê camêrdan hesibîyena û vat: "Labelê cinîyî zî eşkenê nê karî bikerê. Ma debara xo bi hingdarî û ramitişî kenê. Zehmetîya wird karan zî esta. La karê hingdarî hîna zaf zehmet o. Dewa ma wayîrîya nebat û vilan ê cîya-cîyayan kena. O zî beno sebeb ke mêsê hingimênî bêrê tîya.

Adare de wexto ke wisar erdî xemilneno, mêsî vilanê koy û zozanan ra polenan arê danê. O wext karê ma dest pêkeno. Bi nê hawayî nêzdîyê 3 mengî pê arêdayîşê nektaran derbaz benê. Peynîya menga gulane de zî êdî mêsî êdî êdî xo seba arêdayîşê hingimênî amade kenê. Ma nê misê ke hingiman viraznê, kenê qonaxan. Dima ke nê safhayî temam benê, êdî wextê viraştişê hingimênî yeno.  Hingimên mabêne 20ê hezîran û 20ê temmuze de virazîyeno. Ma menga 7. de êdî hingimên vejenê. Verê 3 şilxî bîyî la nika semedo ke peynîya hamnanî ya êdî 2-3 rojan de tena 2 şilxî vejenê. Reyan yew safha de mabêne 10-15 kîloyan hingimên vejîyeno. Berardişê her safha sey yewbînan nîyo. Reyan zêde reyan zî kêm vejêno. Ma kîloyêk ci mabêne 150-170 TL ra roşenê. Bi taybetî zî ma  Amed de roşenê. Uca de muşterîyê ma estê. Reyan zî teberê bajarî ra zî  sîparîşî yenê."

Zahîde qiseyê xo wina qedînayî: "Hingdarî kedêke xeylêk pîle wazena û hem zî xeylêk zehmet a. Ma verê germbîyayîşê roje de bi tûlûman  kutuya mêsan gênê, cayê înan vurnenê. Ma înan kontrol kenê ke hingimên virazîyayo yan ney. Ma serê sibayî rew haya benê heta şanî  xebitîyenê. Reyan zî ma kêm xebitîyenê. Goreyê rewşe karê ma vurîyeno."