Koçerî verê xo danê wareyan: Wina şoro heywankarîye mirena

Koçerê Qerejdaxî hêdî hêdî verê xo danê cayanê berz û honikan. Koçeran bale ante vayîyanê wareyan ser û vat: ''Eke wina dewam bikero heywankarîye do bimira.''

Herêma Qerejdaxî ya Riha de germbîyayîşê hewayî reyde koçerî hêdî hêdî verê xo danê cayanê berzan û honikan. Koçerî payîz de şinê Wêranşer, Serêkanîyê û Heranî. Koçerî zimistanî ra dima zî verê xo danê qezaya Bongilanî ya Çewlîgî.

Ver bi Çewlîgî

Koçerê Qerejdaxî nika Heran de yê. Koçer Hamdullah Olgunî ard ziwan ke mengêke ra dima ê do şorê Bongilan. Olgunî îfade kerd ke koçerîye zehmet a û vat: ''Beno ke ma hêdî hêdî heywananê xo biroşê. Par ma 5 hezar TL meaş dayêne şiwaneyan la emser ma 10 hezar lîra danê. Eke wina şoro ma pêrîşon benê. Par heqê kirayê wareyan 60 hezar lîra bi la nika 100 hezar lîra yo.''

Koçerî Halîl Ogunî zî da zanayene ke zimistanan ê Wêranşar û Serêkanîyê de manenê, nika Qerejdax de yê û do verê xo bidê Çewlîgî. Olgunî vat: ''Ma hînî pê vayîya kirayan nêeşkenê. Eke wina dewam bikero heywankarîye do bimira. Verî wareyî bêpere bîyî la nika kewtî destê bazirganîye. Ma hê rezil benê. Eke koçerîye biqeda, goşt, pendir, şit bi zorî peyda benê. Eke dewlete çareyêke nêvîna, heywankarîye do biqeda.''