Komîteya Ekolojî ya KCKyî bi eşkerayîyêke seba têkoşînê ekolojîkî veng da. Eşkerayîye wina ya:

''Talanê ekolojîkî yê kapîtalîzm û rantgîran her roje benê sebebê rijîyayîşêkê neweyî. Heta ewroyî binê nameyê çareserîye de teyna sereyê nê meseleyan ame girewtene û bi nê hawayî zî meseleyî bîyê giranêr. Birê ke kombîyayîşan û peymananê ekolojî de yenê girewtene, nênê caardene. Her serre texrîbatê ekolojîkî de rekorî şikîyenê. Qirkerdişo ekolojîk hende bîyo pîlêr ke hînî dezgehê sey Neteweyanê Yewbîyayeyan (NY) zî nê kerdişan sey 'felaketî' pênase kenê. Kita û welatanê cîyayan de germîyê rekorî, şewatî, laserî û şerî qewimîyenê û nê qewimîyayîşî asta nê felaketî eşkera kenê. Hêrişê vera ekolojî birînanê xidaran elnê û wina dewam bikero tarîtîye do dewam bikera.

Netîceyanê polîtîkayanê AKP-MHPyî de nê felaketî Kurdîstan û Tirkîya de zî qewimîyenê. Şerê vera Kurdîstanî bîlançoya qirkerdişî keno giranêr. Îqtîdaro faşîst gêreno ke plananê xo yê talan û rantî bivisno dewre. Weçînayîşan ra pey Besta, Gabar, Cûdî û Şirnexî de, Akbelenê Mugla de, Yatagan û Hatay de xoza pêşkêşê şîrketan ameye kerdene. Cûdî de û Licê de artêşa tirke ya faşîste daristanan vêşnena û Xîzanê Bedlîsî de leşkerî daranê seserran birnenê.

Vêşnayîşê dewan ra dima ewro zî kurdan rê pê qedînayîşê zîretî û texrîbatê ekolojîkî koçkerdiş, vêşanîye û feqîrîye yenê ferzkerdene. Rojawan, Başûr û Vakur de qirkerdişê daristanan û zeytûnêran, awbendan, HES û madenan reyde projeyê îşxalî yenê amadekerdene. Riha ra heta Dêrsim, Amed û Botanî erazîyê zîretî pêşkêşê projeyanê GES (Santralê Enerjîya Tîje), HESan yenê kerdene û bi qedexeyê tebervejîyayîşî erazî û şar bêawe verdîyenê. 

Dewlete binê nameyê 'asayîşî' de dişmenîya xo ya vera kurdan meşrû kena. A raşte bombarduman, çekanê kîmyewîyan û projeyanê talanî ra zêdeyêr çîyêk asayîşî nêherimneno. Şer û no talan heta ewro teyna bîyî sebebê dejî û texrîbatê xoza. Heyf ke teyna qirkerdişo ekolojîk hende eşkera nêbi.

Sey pêro felaketanê bînan felaketê ekolojîkî zî hetê îqtîdar û serdestan ra ameyî afernayene û ganî ma verê nînan bigêrê. Nê qirkerdişî mesuldarîye kenê ma milî ra ke vera nînan ma têkoşîn bikerê. No qirkerdişo ke pêro cuye rê tesîr keno, ma rê têkoşînêkê topyekûnî ferz keno. Têkoşîno ekolojîk veerê xoza û ameyoxî de erk û mesuldarîyêk o. Têkoşînê seba ekolojî têkoşînêkê heq û edaletî yo. Ma çend erey bikewê hende daristan, çem, gandarî do destê ma ra şorê, dewî bêrê vengkerdene û cuye bêra çinkerdene.

Rêxistinîya seba ekolojî erkêko mecbûrî û acîl o. Coka roje a roj a ke ma vera hişmendîya faşîste, vera polîtîkayanê talankerdişî xo rêxistin bikerê, têkoşînî pîl bikerê. Ganî ma verî ke erey biboo bi hişmendîya ekolojîke hêzê xo yew bikerê, xoza bipawê. Ganî seba ke verê xesp, qirkerdiş û talanan bigêrê ma cade têbigêrê û têkoşîn bikerê.''