Krîzo ekonomîk ê Tirkîya yo ke giran bîyo, hêz û îmkanê hêrînayîşî kêmîneno.  Krîzo ekonomîk ê Tirkîya bi giranî tesîrê heywankarîye keno. Zêdîyayîşê vaya simêrî reyde varayîşê vewre zî zor dano wayîranê heywanan.

Kurdîstan de bi taybetî heywankarîye çimeyanê esasan ê debare ra yo.

Halîl Îhtîyatogluyo ke Colemêrg de bi serran o heywankarîye keno, vano ke krîzê ekonomîkî reyde varayîşê vewre zî zor dano înan. Îhtîyatogluyî ard ziwan ke zêdîyayîşê simêrî ra ê hînî nêeşkenê heywankarîye bikerê û vat: ''Emser vewre zaf bîye. Varayîşê vewre ra simêro ke ma seba heywananê xo dabi kişte zî binê vewre de mend. Ma hînî pêrîşan bîyî. Welat de krîz est o. Krîzo ekonomîk zaf zor dano ma. Par vaya simêrî 10 lîra bîye la emser 50 lîra ya. Hînî ma nêeşkenê çîyêkî bihêrînê. Xora ma rê zulmêko giran yeno kerdene. Krîzo ekonomîk zî nê zulmî zêdîneno.''