Vakurê Kurdîstanî û Tirkîya de varayîşê zêdeyî û firteneyî ra 2 kesan dinyaya xo bedilnaye û bi desan kesî birîndar bîyî.

Amed de qezaya Farqînî de çemê dewa Fêra ser şi û laser qewimîya. Laserî zerarêko pîl da dewe. Dewa Çemê Elika ya Licê de zî pirdêk binê awe de mend. Dewa Xirawa ya Licê de laser werişt.

Taxanê Huriyet, Gultepe, Fatîh, Belde, Şafak, Karşiyaka, Kultur, Çamlitepe û Seyîtlerî yê merkezê Êlihî de varanî ra laser werişt. Xeylêk ban, kargeh û wesayîtî binê awe de mendî. Taxa Seyîtlerî de Lalîhane Gulera 54 serre kewte verê laserî û dinyaya xo bedilnaye. Şaristan de 3 wayî û 1 bira yê 1-5 serrî  laser de vînî bîyî. Domanan ra Îsrafîl Gunerê 5 serrî dinyaya xo bedilnaye. Ekîbî gêrenê domananê bînan.

Qezaya Pirsûsî ya Riha de dewa Alîgorî binê awe de mende.

Qezayanê Artûklu û Qoserî yê Mêrdînî de laser werişt we. Awe kewte keye, kargeh û wesayîtan. 

Şaristanê Zonguldakî yê Tirkîya de 2 kesî keştîye de mehsur mendî. Ereglî de zî keştîyêke ra xebere nêna girewtene.

Şirnex de, qezayanê Kanîreş û Çermê yê Çewlîgî de, qezaya Pasûr û Bismilî yê Amedî de dibistanan varayîşê zêdeyî ra mabên da perwerdeyî.

Wina pawîyeno ke Êlih, Sêrt, vakurê Serhedî, Riha de varayîş bizêdîyo.

Meteorolojî seba Agirî, Çewlîg, Bedlîs, Elezîz, Erzîngan, Erzirom, Colemêrg, Qers, Mûş, Dêrsim, Şirnex, Erdexan, Artvîn, Mêrsîn, Kastamonû, Meletî, Rîze û Sînopî hişyarîya qodê zerd û turunçî daye.