Têgêrayîşê Ekolojî yê Mezopotamya (MEH) û Yewîya Odayanê Mîmar û Muhendîsan ê Tirkan (TMMOB) Amed de komxebata ekolojî kerde û netîcenameyê komxebate vila kerd.

Netîcenameyê komxebate bi kilmî wina yo:

''-Şerê ke tede çeka kîmyewîye şuxilîyenê benê sebebê texrîbatê ekolojîk û komelkî yê pîlî, tewiranê gandaran çin kenê û şar danê koçkerdene. Coka armanco verên ê têkoşînê ekolojîk caardişê haştîye yo.  Ganî pêro dezgehê ekolojî vera şerî tewirê xo bimojnê.

-Ganî nakokîya xoza-kapîtalîzmî bi têkoşînî bêra çinkerdene û merkezê hoka ewnîyayîşî de merdim û xoza ca bigêrê. 

-Seba rijîyayîşê Heskîf û Sûrî rexne bêro dayene, nê rijîyayî nêrê vîrakerdene û vîro kolektîf wa bêro awankerdene. 

- Têkoşînê ekolojî heman wextî de wa bibo têkoşînê azadîya cinîyan.

-Bi rayîrê ocaxê mermeran, HESan, vengkerdişê dewan, awbendan yeno waştene ke şar bênasname bêro verdayene. 

-Vera  şer û krîzê ekolojîkî xoverdayîş û têkoşîno hempar bêro kerdene.

-Ganî bi taybetî Dêrsim de ke tede 145 ocaxê madenî est ê, têkoşîno huqûqî û rêxistinîya xoverdayîşî bêra kerdene.  

-Nêrazîbîyayîşê vera talanê ekolojî yê Kurdîstan û Tirkîya yew nîyê. Hêrişê vera xozaya kurdan sîstematîk û qestî ra yê. Ganî vera nê hêrişan refleksêko têdûşt bêro mojnayene. 

 -Ganî vera talanê sermaye û dewlete bi ruhê hemparî bêro têgêrayene.   

-Seba heywanan û heqê heywanan zî ganî têkoşîn bêro kerdene. 

 -Seba domanan ganî mufredatê perwerdeyê agroeolojî bêro ronayene.

 -Vera xoza sûc yeno kerdene. Ganî sûcê vera xoza sey sûcê qirkerdişî bêrê ercnayene û sey 'ekoqirkerdiş' bêrê pênasekerdene. 

- Ganî madeyê kîmyewîyî mîyanê werd û berheman ra bêrê vetene.

-Têkoşînê vera şewatê daristananê Kurdîstanî û daristananê Koyanê Kazî têdûşt bibo.   

-Vera kapîtalîzm, talan û polîtîkayanê rijnayîşî têkoşîno hempar bêro kerdene.''