Hukmatê AKP-MHPyî 2014 de seba viraştişê HESî qezaya Ercîşî ya Wanî de Çemê Zîlane ser de dest pê xebate kerdbi. La dima xebatî muracatê rêxistinanê xoza û dewan ser o hetê Şuraya Dewlete ra ameybî vindarnayene. La wextê Korona de 2019 de xebatê HESî newe ra dîyabî destpêkerdene.

Dewijan dima reyna Înîsîyatîfê Ekolojî yê Zîlane reyde muracatê rayîranê huqûqî da. Mehkemeya Îdareyî yê Wanî dîyar kerd ke bira 'raporê ÇEDî hewce nîyo' ya Wezîrîya Dorme û Şaristanîye qanûnî nîya û bire betal kerde.

Vervatoxê Înîsîyatîdê Ekolojî yê Zîlane Şahabettîn Demîrî derheqê babete de agahîye daye û vat: ''Ma wazena şîrketa HESî zî bêra qefilnayene. Ma do dewaya ney bikerê. Şîrketê madenî, HES û ê bînî gêrenê cewheranê ma, nê pêro sermaye yê û ma nînan red kenê. Rixmê bire zî xebatê HESî hê dewam kenê. Ganî nê xebatî cade vinderê. Eşkera yo ke na bira mehkeme qîm nêkena. Heta ke no HES bêro qefilnayene û herême ra şoro ma do têkoşîn bikerê.''