Mîkaîl Aslan: Çimeyanê Munzurî de hal yaman o

Hunermend Mîkaîl Aslanî hesabê xo yê medyaya sosyale ra bi vîdeoyêk bale ante muhîmîya Çimeyanê Munzurî ser û veng da ke hema ke erey nêbîyo wa ci rê wayîr bêro vejîyayene.

Çimeyê Munzurî yê Pulurî  yê ke semedê elewîyan bimbarek ê, pê îhaleyê dewlete seba rantî ameyî pêşkêşkerdene. Vera projeyê talankerdişî her hetî ra vengê nêrazîbîyayîşî berz benê. Hunermend Mîkaîl Aslanî zî bi videoyêk bale ante babete ser.

Mîkaîl Aslanî vist vîrî ke Çimeyê Munzurî semedê şarê Dêrsimî senî muhîmî û vat: ''Verî wexto ke şarê ma şîyêne jîyargeyan hende qîymet dayêne ci ke hela ke tira bîyênê nizdî postalê xo vetêne û warway şiyêne. Serranê peyênan de ma ke şinê jîyargeyan vînenê ke şarê ma hetêkî ra pîknîk keno, alkol şimeno û pêrodayîş keno û hetê bînî ra kamilê  ma ûca dûa kenê. Eke ma wayîrê jîyargeyanê xo mevejê, qedr û qîymet înan medê, xora şar yeno paskul dano piro û dişmen yeno rijneno. Nê rojan de Çimeyanê Munzûrî de hal yaman o. Eke ma raşta zerrî ra wayîr erjanê xo bivejîyayêne wina nêbîyenê. Coka ma se kerd, xo rê kerd, ma se kerd xo bi xo  kerd. Ma no firsend da dişmenî coka dişmen rijneno. Ma firsend dayo şarî, dayo hukmatî, coka ma ser kay kenê. Hukmat çara hêz geno ke yeno jîyarê ma rijneno? Heqîqet oyo ke ma no firsend dayo înan. Heme ke erey nêbîyo gerek ma vera nê rijnayîşî vengê xo berz bikerê û ewro wayîrê erjanê xo vejê. Dewê dormeyî, şarê ma yê teberî, şaredarî ma pêro pîya gerek her hetî bi vengê xo berz bikerê û verê ci bigêrê ke ma siba pîşman mebê.''