Dewanê Şamoşî û Zogarî yê qezaya Xozatî yê Dêrsimî de mengêke û nêm ra nata darî birîyenê.

Wird dewî zî serra 1994î de ameybî vengkerdene. Par dewan ke bi bahaneya operasyonê leşkerî darî ameybî vêşnayene, emser zî bi bahaneya 'newe ra resnayîşî' darê herême yenê birnayene. Birnayîşê daran bi îhale dîya şîrketêke û dîya zanayene ke qasê warê 400 hektarî de darî bêrê birnayene.

Wekîlê HDPyî yê Dêrsimî Alîcan Onluyî û Hemserekê HDPyî yê Dêrsimî Ferhat Yildizî dewan de cigêrayîşî kerdî.

Wekîl Onluyî da zanayene ke herême de qirkerdişê daran qewimîyeno û vat: ''Par na herême bi temamî ameye vêşnayene. Emser zî darî yenê birnayene. Herêma vêşaye de nê darê weşî birîyenê. Verî binê nameyê opersyonê leşkerî de hişmendîya ke dişmenê bawerî, kultur û ziwanê na herême ya, darî vêşnayî nika zî birnena. Par ê nêeşkayî daran bivêşnê coka emser birnenê. Ganî pêro heskerdoxê xoza vera nê qirkerdişî vengê xo vejê.''