Wekîlê HDPyî yê Dêrsimî Alîcan Onluyî derheqê qetilkerdişê pezkovîyan de vernîyazêkê persî da Meclîs û waşt ke Wezîrê Daristanan û Zîretî Bekîr Pakdemîr wa cewab bido ci.

Onluyî da zanayene ke serranê peyênan de binê nameyê 'turîzmê seydîye' Dêrsim de pezkovîyî yenê qetilkerdene. Onluyî vist vîrî ke pezkovîyî bawerîya 'Raya Heqî' de fîraz ê û dêrsimijî bi xo xîret kenê ke vera nê qirkerdişan bigêrê.

Onluyî eşkera kerd ke rixmo ke îhaleyê seydîye ameyî betalkerene pezkovîyî hetê seydwananê qeçaxan û provokatoran ra yenê qirkerdene.

Onluyî pare kerd ke tewr peyên Mazgêrd de 8 pezkovîyî merde dîyayî û rayîrê Pilemurîye-Dêrsimî de zî pezkovîyêk reyna merde dîya. 

Onluyî vat: ''Dêrsim de xoza, kerra, pêro heywanî girîng ê. Her hêrişê vera xoza û heywananê Dêrsimî heman wextî de hêrişê vera kultur û bawerîya Dêrsimî yo. Dêrsimijî wazenê ke kerdoxê nê qirkerdişan bêrê dîyene û bêrê teşhîrkerdene.''

Onluyî vernîyazê xo de nê persî persayî:

-Derheqê serebûtê qetilkerdişê pezkovîyî yê Pilemurîye de tehqîqatêk dîya destpêkerdene? Guleyê ke pezkovîyî ra vejîyayî kamyew çeke ra erzîyayî?

-Dêrsimo ke bi 24 saetan pê kamerayan yeno teqîbkerdene senî tede qirkerê pezkovîyan nêdîyenê?

-Serra 2020î de Dêrsim de çend pezkovîyî kişîyayî û çend qirkerê pezkovîyan tepişîyayî?'