Cografyaya Kurdîstanî hetê dewleta tirke ya îşxalkere ra binê nameyê şerî de yena talankerdene û qetilkerdene. Bomba û gazê kîmyewî yê dewleta tirke xozaya Kurdîstanî kişenê. Bi taybetî wextê Rewşa Îstîsnayî de viraştişê kalekolan reyde talanê daristanan zî zêdîyayî. Reyna viraştişê awbendan zî heto bîn ê nê qirkerdişî yê. Awbendê Kurdîstanî qasê se ra 40 awbendanê Tirkîya rê zêdêr ê.

Hemvervatoxê Paltformê Pawitişê Hewsêlî Vahap Işikliyî ANFyî rê derheqê mesele de qisey kerd.

Işikliyî ard ziwan ke Kurdîstan de talanê dewlete berdewam o û vat: ''HESo ke yeno waştene Çemê Zîlane û Layê Sarimî de bêro kerdene do warê cuye binê awe de bimano. Koyê Cûdîyî de serrêke ra nata birnayîşê daran dewam keno. Şewat û birnayîşê daran reyde Koyê Cûdîyî ame çinkerdene. No qirkerdiş keno ke gandarî bimirê, nêweşîyî bizêdîyê.''

Işikliyî vist vîrî ke dewa Şêxan a qezaya Payîzava ya Wanî de dewijî vera ocaxê mermerî xo ver danê û vat: ''Senî ke vera mergê masêyanê Marmara veng yeno vetene gereka vera talanê xozaya Kurdîstanî zî veng bêro vetene. Cûdî de her roje 400 ton darî yenê birnayene la na rewşe nêbena rojdem. HESî reyde masêyê ma zî merdî. La selahîyetdaran derheqê ney de eşkerayîyêke nêkerde. Payîzava ra heta Îkîzdere ma hetê dewijanê têkoşeran de yê. Xozaya ma hempar a, têkoşînê ma hempar o. Coka gereka ma vajê 'dinyayêka newîye mumkîn a' û têkişt vinderê.''