Wekîl û Hetkarê Hemserekanê Komîsyonê Ekonomî ra Berpirsîyar Garo Paylanî ANFyî rê polîtîkayê ekonomî yê îqtîdarê AKP-MHPyî ercnayî.

Paylanî da zanayene ke Vakurê Kurdîstanî û Tirkîya de 10 mîlyon bêkarî estê û vat: ''Her 4 kesan ra di kesî û her 2 ciwanan ra ciwanêk bêkar ê. Goreyê TUÎKî têna 4 mîlyon kesî bêkar ê. La TUÎK doneyan manîpule keno. Îqtîdar pêro çime û budçe dano terefgîranê xo. Tîya de ekonomî de bêusûlîye yena kerdene. Hemwelatîyî cara xizan ê la eke dîktatorîya îqtîdarî dewam bikerê hemwelatîyî do binê enflasyonî de bimanê. Her ke terefgîrê AKPyî bîyî zengîn şar bi xizanêr. Ma pêşnîyaz kerd ke meaşo asgarî wa bibo 4 hezar TL la îqtîdarî qebul nêkerd. 2 hezar û 825 TL meaşê sefaletî yo. Anqara de çarxê bêusulîye û îsrafî esto. Ma do nê çarxî birijnê. Ma do seba naye gamanê bitesîran bierzê.''

Paylanî îfade kerd ke heqê çimeyanê Vakurê Kurdîstanî erşawîyenê rojawanê Tirkîya û vat: ''Îqtîdar hema zî wazeno uca de kolonyalîzmê xo xorin bikero. Îqtîdar cografya û ekonomîya Vakurê Kurdîstanî weno. Ganî uca de tay xebatî bêrê kerdene.''

Paylanî pare kerd ke îqtîdarî parçeyo pîl ê budçe da polîtîkayanê şerî û vat: ''Îqtîdar pere dano S-400an, tank û topan ûsn. Eke budçeyê şerî bidîyo hemwelatîyan o çax aramîye virazîyena. Ez hemwelatîyanê ma rê vana ke polîtîkayê şerî hem aramîya ma xerpnenê hem zî ma kenê xizan. Heta ke hemwelatîyê ma hesabê nê pereyan nêpersê no sîstemê dizdîye wina dewam keno. Ez venga pêro hemwelatîyan dana ke wa hesabê bacanê xo bipersê. Ma Meclîs de hesabê ci persenê la ganî hemwelatîyê ma zî dest bierzê na babete.''