Qezaya Erdîşî ya Wanî de hukmatî 2014 de Çemê Zîlane de dest pê viraştişê HESî kerd. Rêxistinanê xoza û dewijan naye ser o muracatê Mehkemeya Şêwirmendîye kerd. Mehkeme bira betalkerdişî daye la rixmê ney zî hukmatê AKPyî Çemê Zîlane de HES viraşt û vist dewre.

Virazîyayîşê HESî ra nata Zîlane de maseyî bi hawayêkê komkîyî mirenê, dewijan zî dest pê koçberîye kerd. Herêma Zîlane de 30 dewî est ê û nînan ra 10 dewî binê tesîrê HESî de mendî.

Vervatoxê Înîsîyatîfê Zîlane Şahabettîn Demîrî derheqê babete de ANFyî rê qisey kerd û da zanayene ke asta awe ya Çemê Zîlane kêmîyaye coka maseyî mirenê. Demîrî vat: ''Ma do warê huqûqî de newe ra têbigêrê. Xora Mehkemeya Şêwirmendîye de dewaya ma dewam kena. Tewr peyên Mehkemeya Îdareyî ya Herême raporê pisporan  amade kerd ke bêteref nîyo. Ma wazenê pisporî, arkeolog, muhendisê xoza zî tewrê na dewa bibê.''

Demîrî dîyar kerd ke HESî ra herême de zîret û heywankarîye nêmenda û vat: ''Nika zî dewijî hê vera koç kenê. Keyeyî hînî Zîlane ra şinê. Goreyê bira Mehkemeya Şêwirmendîye ma do newe ra têbigêrê û erdê xo heta peynî bipawê.''