Gelîya Înî de ke mabênê dewanê Sorek, Koterîç û Dirbanî yê qezaya Mazgêrdî yê Dêrsimî de ya, nêzdîyê mengêk a pezkovîyî kişîyenê. Kesê ke Semsûr, Osmanîye, Xarpêt û Çewlîgî ra yenê pezkovîyan kişenê. Roniştoxanê herême vera ney nêrazîbîyayîşê xo mojna.

Roniştoxê dewa Sorekî Fîrkan Aslanî ard ziwan ke gelîye seba înan warêko fîraz o û seydwanî hem zerar danê heywanan hem zî ekolojîya herême. Aslanî vat: ''Wexto ke ma vera nê merdiman nêrazîbîyayîşê xo mojnenê seydwanî belgeyê destûrî mojnenê ma. Ma zimistanan nê heywanan rê werd verdenê la seydwanî yenê nê heywanan kişenê. Seydwanan bi xo şarî rê vato destûrê înan esto.''

Aslanî pare kerd ke seba ke verê seydwanîye bêro girewten ê şîyî qereqolê Kizilkaya û qereqolî înan rê vato ''Destûrê seydwanan esto, ma nêeşkenê çîyêk bikerê.'' Aslanî vat: ''Belgeyê înan xemê ma de nîyo. Ma ney qebul nêkenê.  Wa erjê ma nêrê çinkerdene.''

Roniştoxê dewa Koterîçî Alîcan Gunduzî da zanayene ke înan seydwanan rê vato ''Tîya ra şorê.'' Gunduzî vat: ''Eke reyna seydwanî bêrê ma do tedbîranê xo bigêrê. Tîya wareyê ma yo. Ma do heywanan ra fek vera nêdê. Wa vera seydwanîye tedbîrî bêrê girewtene. Çi hewce keno wa bêro kerdene. Ma do nêverdê seydwanî nê cayan de bigêrê.''