Deweka Dotka ya dewa Dirbêsanî ya qezaya Geverê Colemêrgî de  cuye semedê cinîyan pa germbîyayîşê hewayî  hîna zehmet bena û prosesê bêrivanîye dest pêkenê. Nê cinîyanê kedkaran ra yewe zî Haci Baciye Kaplana 58 serre ya. Haci Baciye Kaplan derheqê keda cinîyan û viraştişê penîrî de qisey kerd.  

Haci Baciye dîyar kerd ke cuya dewe xeylêk weş a û 30 serrî yo na dewe de ciwîyena û vat: "Verê ma şîyêne zozanan ma 3 aşmî tede mendêne. Ma hem şiwanî kerdêne hem zî ma ewnîyayêne tûtan ra. O wext 10 tûtê mi estibî. Nika ma şinê zozanê dûran. Ma bi wesayîtan şinê. Verê ma niştêne estoran û ma bi aşman çadiranê xo de mendêne."

Haci Baciye pare kerd ê şit kenê penîr, mast, serşit. Baciye vat: ''Ma şitê ke zêde resnenê pê, ma danê cîrananê xo yê ke pesê înan çin ê. Ma cîranî hetkarî danê yewbînan. Ma serê sibayî rew wirzenê û amadekarî kenê. Ma şit ancenê. Ma şit kenê beroşê pîlan. Dima ra sefênenê. Semedê şitê ma pak bo, ma di rey sefênenê. Ma dima kenê beroş û amîn kenê. 20 deqe ma pabeyê ci vindenê. Dima ra ma vaşê xo yê ke arêdayê kenê ci. Dima ra ma awa penîrê xo safênenê û penîr kenê turikan. Ma kerra danê serê turikan û di rojan wina bende manenê. Dima ra ma penîr birnenê û kenê bîdonan û kenê erd."

Haci Baciye tewr peyên vat, rojê înan bi berîvanî û bi viraştişê berardişê şitî derbas bena û rixmê hende zor û zehmetî karê xo ra zaf hes kenê û vat: "Ma pêro karê xo bi xo kenê. Ma pes wey kenê, penîr û mast viraznenê. Cuya dewe weş a. Her çî ma xoxayî yo. Têkiliyê ma yê bi cîranan dir xeylêk weş o."