Hemserekê Heyetê Ekolojî Îbrahîm Esedî derheqê karanê ekolojî yê Rojawanî û konferansê ekolojî yê nîsane de ANFyî rê qisey kerd.

Esedî vist vîrî ke Şorişê Rojawanî yê 19ê Temmuze reyde mîyanê komelî de vurîyayîşî qewimîyayê û vat: ''Îdareyê Xoserî yê Rojawanî tim xîret kerd ke hişmendîya ekolojî aver bero. Heyf ke hêrişanê Tirkîya ra xebatê ma yê ekolojîkî tay qels mendî. Ancî zî Komîteya Ekolojî Peymana Komelkîye îlan kerde û karê xo kerdî. Hêrişê dewleta tirke ya îşxalkere bi taybetî îşxalê Efrînî, Serêkanîyê û Girê Sipî zerarê pîlî danê xoza.''

Esedî da zanayene ke sey Komîteya Ekolojî înan tay plansazîyî kerdî vernî û ê nê bingeyî ser o Meclîsê Ekolojî û Akademîya Ekolojî de xebatan kenê. Esedî bale ante ser ke 26-27ê nîsane de serkêşîya komîte de Konfransê Ekolojî ameyo kerdene û vat: ''Xeylêk welatan ra akademîsyen û aktîvîstê ekolojî tewrê konferansî bîyî. Konferans de karê nikayênî û karê ke do bêrê kerdene ameyî ercnayene.''

Esedî dîyar kerd ke dewleta tirke vera Rojawanê Kurdîstanî bi hawayêkê sîstematîkî qirkerdişê ekolojîk û komelkîyî ana ca. Esedî vat: ''Dewleta tirke û rejîmê Şamî seba ke Îdareyê Xoserî birijnê hêrişê xoza zî kenê. Rejîmê Şamî Rojawan de karanê narkotîkî keno. Komîteya ma vera ney zî xebatan kena. Hetê bînî ra dima ke Tirkîya de Çemê Firatî de madenêk de sîyanur teqa rîskê awa ma zî zêdîya. Ma her roje testan û analîzan kenê. Nika ma armanc kenê ke asta mîyanneteweyîye de konferansêkê ekolojî virazê. 

Karê ma yo verên no yo ke mîyanê komelî de ferasetê ekolojî aver berê. No karêko emrderg o. Seba ney akademîya ma est a. Akademî de bingeyê paradîgmaya neteweya demokratîke de ma xebatan kenê. Îdareyo Xoser goreyê krîterê ekolojî têgêreno û pêro mesuldarîyanê xo bi hesasîyetî ano ca.''