Merkezê Çapemenîye yê QSDyî derheqê bîlançoya 24 saetan a xoverdayîşê dewanê Minbicî û Dêr Hafîrî de eşkerayîye daye û nê vatî:

''Hêrişê dewleta tirke ya îşxalkere û çeteyanê ci yê vera herêmanê rojhelat û başûrê Minbicî bitaybetî dormeyê Awbendê Tişrînî dewam kenê. Hêzê Meclîsê Leşkerî yê Minbicî bi hewayêkê qehremankî cewabê hêrişan danê.

Vizêr saete 21.00 de dewleta tirke ya îşxalkere bi teyarayanê şerî Awbendê Tişrînî û dewê dormeyê ci panc reyî dayî bombayan ver û hema bi obusan hêriş kenê. Herême de têgêrayîşê wesayîtanê hewayî yê bêmerdiman zî heta saetanê şewe dewam keno.

Dewleta tirke seba ke qilêkê nizdîyê herêma Awbendê Tişrînî de baregehê leşkerî rono sewqîyatê çekanê giranan û muhîmatî kerd. Yewîyanê Şehîd Harunî vera nê cehdkerdişî cewab da û yew obus û rampaya fuzeyê Gradî îmha kerdî. Yewîyanê Şehîd Harunî reyna konveyêkê wesayîtanê zirxinan zî hedef girewt. Çalakîye de xeylê çeteyî ameyî kiştene û birîndar bîyî la hûmara înan nêameye zelalkerdene. Îşxalker û çeteyan ke waştêne baregehê ronê herême ra remayî.

Cepheyê Dêr Hafîr de zî Yewîyanê Şehîd Harunî dewa Hebûba de wesayîtê leşkerî yê çeteyan hedef girewt. Wesayît pîya bi çeteyanê ke tede bî bi temamî ame îmhakerdene. Dêr Hafîr de dronê kamikaze yê çeteyan ame înfîlakkerdene. Hêriş de vînîbîyayeyê hêzanê ma çînê. Pîya bi nînan herême de têgêrayîşê droneyanê dewleta tirke dewam kerd.

2 rojanê peyênan de Meclîsê Leşkerî yê Minbicî herêmanê rojhelat û başûrê Minbicî û dormeyê Awbendê Tişrînî de derbeyê giranî dayî çeteyanê dewleta tirke ro. 72 çeteyî ameyî kiştene û bi desan çeteyî birîndar bîyî. Reyna xeylê panzer û wesayîtê leşkerî yê îşxalkeran ameyî îmhakerdene.''