Wendekara Zanîngehê Munzurî Gulîstane Doku 5ê çeleyê 2020î ra nata Dêrsim de vinîbîyaye ya. Komîsyonê Edaletê Seba Gulîstane Doku serrgêra pancine ya vinîbîyayîşê Gulîstane yê şikdarî de qezaya Kadikoyî ya Îstanbulî de eşkerayîyêke daye. Wekîla DEM Partî Ozgule Sakî zî tewra  eşkerayîye bîye. Eşkerayîye de sloganê sey ''Jin, Jiyan, Azadî'' ameyî vatene û pankarta ''Gulîstane Doku û Rojbîne Kabaîş îsyanê ma yê'' ameyî akerdene.

Zeynepe Tekîn nameyê komîsyonî ser o eşkerayîye wende û pre kerd ke dosyaya Gulîstane de verguman Zaynal Abarakov û babîyê ci yo polîsan ameyî veradayene. Zeynepe vat: ''Dewleta camêrdan seba Gulîstane tehqîqatêko bitesîr nêkerd. Vinîbîyayîşo şikdar binê nameyê xokiştişî de ame mîyankerdene. Mehkemeyî hetê camêrdan de yê û faîlan pawenê.''

Zeynebe vist vîrî ke mergê Rojîne yo şikdar zî yeno mîyankerdene û vat: ''Hinî binê nameyê 'xokiştişî' de cuya cinîyan destê înan ra megêrê. Dewlete Wan de, Dêrsim de vera cinîyan polîtîkayanê taybetan ana ca. Ma vera nê polîtîkayan qîrenê. Wa Abarakov bêro muhakemekerdene, mergê Rojîne bêro roşnîkerdene, astengîyê vera wird dosyayan bêrê wedaritene. Ma do seba cinîyan heta peynî biqîrê, hesab bipersê.''