Tarîx de reya verêna ke Qutuba Başûrî de germîya hewayî  20 dereceyan ra şîye dîyar. Goreyê rojnameyê The Guardianî yê îngîlîzî termometreyê zanyaranê Brezîlya yê Girawa Seymurî roja yewşemeyî derece 20,75 mojna.

Heman herême de rekoro verên 19.8 derece bi ke serra 1982î de ame peymitene. Dereceyo ke ame peymitene ganî hetê Rêxistina Meteorolojî ya Dinya ra bêro fermîkerdene. Germîya hewayî ya Qutuba Başûrî goreyê serra 1850î qasê 3 dereceyan zêdêr bîye.