Emser semedo ke varan tay varayo Vakurê Kurdîstanî de rewşa zîretî zî hol nîya. Goreyê doneyanê Mudirîya Pêroyî ya Meteorolojî Riha kategorîya 'ziwabîyayîşê îstîsnayî' de ya. Şaristan de nika zî ziwabîyayîşî ra darê fistiqan wişk benê.

Taxa Esemkulu ya qezaya Karakopru ya Riha de citkar Omer Çobanî ard ziwan ke darê înan benê wişk û vat: ''Emser semedo ke varan tay bi darê ma hê benê wişk. Temamîya Riha de wina yo. Emser darê ma bêvîtamîn mendî. Kêmvarayîşî ra sil zî daran rê fayde nêkerd. Ma dewlete rê vajê se? Ma Mudirîya Zîretî ya Şaristanî rê vat la se bî? Cuya ma xemê înan de nîya. Ma goreyê qewetê xo xîret kenê ke daranê xo bixelisnê. Bi hezaran darî wişk benê. Heyf o.'' 

Akademîsyenê Zanîngehê Harranî Doç. Dr. Alî Riza Ozturkmenî ard ziwan ke vîrusê ''Pyhtoplasma" Riha, Dîlok û Mereş de zêde yo û tesîrê wişkîye keno. Ozturkmenî vat: ''Beno ke naye ra nebatî zêdêr weş nêbenê. Ganî merdimî vera nê vîrusî daranê xo serûm bikerê û zereyê nê serûmî de çînko, asin estbê. Ganî darî hol bêrê awdayene. Eke nê tedbîrî bêrê girewtene darî do bixelisê.''