Vera tecrîdê giranî yê serê Rayberê Şarê Kurdî Abdullah Ocalanî çarçewaya kampanyaya Abdullah Ocalanî rê Azadîye Meseleya Kurdan rê Çareserîya Sîyasîye de ya ke 10ê teşrîna verêne ya 2023yî de ameye destpkerdene nêrazîbîyayîşî zêîyenê.

Wextê kilmî de sîyasetmedar, hunermend, akademîsyen û pawitoxanê heqanê merdiman ra 61 şexsanê fransizan Komîteya Vergirewtişê Îşkenceyî yê Ewropa (CPT)  rê mektub nuşt û waşt wa vera tecrîdê Îmraliyî têbigêro.  Îmzakerdoxanê mektubî ra senatora fransize Anne Souyris derheqê şertanê Îmraliyî de û na babete de berpirsîyarîya Ewropa de ANFyî rê qisey kerd.

Senatora fransize Anne Souyris waşt wa tecrîdê serê Rayberê Şarê Kurdî Abdullah Ocalanî cade bêro wedaritene û nê vatî: ''Ma bi mektûbê xo CPTyî ra waşt wa Birêz Ocalanî zîyaret bikero û seba ke heqê ci bêrê caardene şiro Tirkîya ser. No tecrîd îşkence yo, goreyê demokrasîyî nîyo. Tecrîd semedê keyeyê Birêz Ocalanî zî îşkence yo. Tecrîd eynî wextî de vera şarî zî zext o. Seba ke ma eşkenê xo Ewropa de îfade bikerê ganî ma vera nê tecrîdî têkoşîn bikerê. Ganî ma warê mîyannetewyeî de vera nê tecrîdî têkoşîn bikerê. Seba ke tecrîd bêro qedînayene û reyna mero kerdene ganî ma şirê Tirkîya ser. Ganî Ewropa bi cesaretê sîyasîyî şiro Tirkîya ser ke Tirkîya bêro vindarnayene.

Semedê bedilnayîşê rewşa Birêz Ocalanî û vindarnayîşê şerê Tirkîya yê vera kurdan zaf yawaş yeno têgêrayene. Dezgehê Ewropa semedê menfeatê xo vera kerdişanê Tirkîya bêveng ê. Tay wezîrê Ewropa paştî danê kurdan. Kurdê ke hetê Tirkîya ra yenê tehdîtkerdene Ewropa ra yenê sînorteberkerdene. Eynî wextî de ma nêeşkenê hem paştî bidê hem zî vera neheqîye bêveng bimanê. Fransa de zî Ewropa de zî cesareto sîyasî hewce keno. Ganî hetê ekonomîkî ra şiro Tirîya ser. Birêz Erdogan hewceyê Ewropa yo, hewceyê paştayîşê ma yo û eşkenê nê paştîdayîşî bikerê bişertî.

Ewropa eşkena vera Tirkîya zext bikero. Ganî nê bikero. Meseleya kurdan têna bi dîyalog û mezakereyî eşkena bêro çareserkerdene. Binê nameyê PKKyî de ya zî bi tewirê bînî, çîyo muhîm oyo ke ganî masaya muzakereyî de bêro roniştene. Ewropa herdinda pasîfmendişî de eşkena semedê caardişê nê dîyalogî rol bîgêro. Ewropa eşkena sey hetê hîrêyinî têbigêro. Parlamentoyê Ewropa eşkeno qeraran bîgêro, semedê pêvînayîşê bi Erdoganî heyetan bişawo û qet çîyêk mekero zî eşkeno hetkarîya xo vera Tirkîya vindarno.''