Taxa Bozî ya qezaya Sêwrege ya Riha de citkarî seba ke DEDAŞ her roje ceyranî birneno nêeşkenê bîranê sondajî ra awe bidê berhemanê xo.  

Citkaran derheqê babete de Ajansê Mezopotamya rê qisey kerd.

Citkar Husnu Demîrî (33) da zanayene ke ey 12 donimî îsotî ramitî û 200 hezar lîra mesref kerdo. Demîrî vat: ''DEDAŞ serê sibayî awe birneno û heta şanî awe nêdano. Ma tim gerre kenê la DEDAŞ vano 'xesar est o.' 10 rojan de mi teyna 4 saetî awe daye firîng û îsotanê xo. Herinda 15 tonan de mi teyna 3 ton berhemî girewtî.'' 

Citkar Ramazan Çankarî (56) pare kerd ke ey 4 mîlyon lîra zerar kerdo û vat: ''Ceyran tay rojan tewr çin o, rojê bînî zî 20 saete çin o. Erdê ma est o, awa ma zî est a. La merdimê ma nê kerdişan ra şinê benê karkerê serrwextî û rayîran de mirenê. Ma wazenê erdê xo biramê.'' 

Abdulkadîr Arikanî (40) vat: ''Mi 300 hezar lîra zerar kerd. Ma nêwazenê nê erdê xo biteriknê şorê xizmetê şarê bînî bikerê. La çew vera zulmê DEDAŞî vengê xo nêkeno. Seba ke ma kurd ê, ma rê wina zulm yeno kerdene. Antalya de rojêk ceyran çin bo dinya do birejîya la ê ma bi rojan çin o.'' 

Muhendîsê zîretî Serhat Altindagî  bale ante ser ke kerdişanê DEDAŞî ra bereketê berheman nêmendo û vat: ''Eke na meseleya ceyranî safî biba bereketê erdê ma zî xo bizêdîyo, hûmara karkeranê serrwextî bikêmîya û îstîhdam bizêdîyo.''