Qezaya Îlîçî ya Erzînganî de dewa Çopanî de madenê zerdan o ke aîdê Şîrketa Lîdya Madencîlîkî yo, tira sîyanur herikîya şi Çemê Firatî. Heyetê Yewîya Odayanê Muhendîs û Mîmaran (TMMOB) 7ê temmuze de war de cigêrayîşî kerdî.

Heyetê TMMOByî de Sekreterê Heyetê Koordînastyonê Şaristanî (ÎKK) yê Dêrsimî Ugur Beycanî zî ca girewt. Beycanî derheqê babete de Ajansê Mezopotamya rê qisey kerd. 

Beycanî da zanayene ke seba ke raporo pozîtîf ê ÇEDî  bêro betalkerdene ê şîyê çimdarîye û vat: ''Ma dî ke seba ke warê madenî bêro hîrakerdene cayêk cara raporî ra verî ameyo amadekerdene.''

Beycanî îfade kerd ke goreyê agahîyanê ke resayê înan warê madenî de cayê herikîyayîşê sîyanurî de vilikê laleyî ronîyayê. Beycanî vat: ''Ê wina mojnenê ke 'rixmê herikîyayîşê sîyanurî zî war de vilikî resenê.'  ''

Beycanî bale ante ser ke warê madenî heman wextî de serê faya erdlerzî de yo û wextêkê nêzdî de tîya de yew erdlerzo pîl pawîyeno. Beycanî vat: ''No ca nêzdîyê fayanê pîlan û krîtîkan o. Hetê jeopolîtîkî ra zî tîya de tehlukeyêko pîl est o.'' 

Beycanî dîyar kerd ke Îlîç de madenkarîya kolonyalîste est a û vat: ''Eke maden dewam bikero, heywanî do zerar bivînê. Goreyê agahîyanê ma uca de doneyanê bîyayîşanê neweyan de nîsbetê seqatî û mergî zaf ê. Sîyanur çîyo winasên o ke erdî jehrî keno. Laya ke sîyanur herikîyeno ci, awa ci şina Firat û Basra.  Îlîç de de vera weşîya komelî, xoza û dormeyî rewşêka afate est a. Ma sey TMMOBî na rewşe kerde rojdem. Ganî no maden cade bêro qefilnayene.''